Poljud uglas zapjevao u čast Miše Kovača: "Noćas ćemo zemlji k'o materi reći"

U sjenci ubjedljive pobjede Hajduka nad Goricom rezultatom 5:0, u okviru 12. kola HNL-a, splitski stadion Poljud zadesila je tužna vijest. Slavlje navijača naglo je prekinuo zvanični spiker objavom: „Preminuo je Mišo Kovač“.

Pjesma posvećena igračima Hajduka utihnula je u sekundi, a potom su sa razglasa pušteni vanvremenski hitovi muzičke legende. Posebno emotivan trenutak uslijedio je kada je blizu 12.000 navijača na tribinama uglas zapjevalo stihove pjesme „Noćas ćemo zemlji k'o materi reći“.

Od legendarnog pjevača oprostio se i splitski klub putem društvenih mreža, posvetivši mu emotivnu poruku:

„Ali negdje zvona zvone i skidaju ljudi kape. Tvoje pjesme živjeće vječno! Počivao u miru Božjem“.

Mate Mišo Kovač preminuo je danas u 86. godini, ostavivši za sobom neizbrisiv trag na regionalnoj muzičkoj sceni.

Decenijama je popularizovao dalmatinski melos širom bivše Jugoslavije, stvarajući neke od najvećih hitova domaće zabavne muzike.

Kao strastveni navijač „bilih“, Mišo je ostao upamćen i po kultnom nastupu na prepunom Poljudu, kao i po izvođenju pjesme „Ja ne mogu drugo nego da ga volim“, koja je postala jedna od zvaničnih himni Hajduka i trajni simbol navijačke privrženosti klubu.