Njemačka vlada potvrdila da plaća Vučićevog savjetnika

Njemačko Ministarstvo privrede potvrdilo je na upit Dojče vela da vlada u Berlinu plaća savjetnika predsjednika Srbije Aleksandra Vučića. Kako navode, „on pomaže pri izgradnji i razvoju proizvodnih lokacija njemačkih firmi srednje veličine u Srbiji“.

Na pitanje Dojče velea da li može da potvrdi navode iz srpskih i njemačkih medija, da je Jerg Heskens na platnom spisku Ministarstva privrede, Tim-Niklas Vencel, jedan od portparola tog njemačkog ministarstva kaže da to „ne može da potvrdi u tom obliku“, jer je, kaže, „Heskens zaposlen s punim radnim vremenom zaposlen u GIZ-u“ (Njemačkom društvu za međunarodnu saradnju).

- On je zaposlen kao dugoročni savjetnik u upravnom partnerstvu između Saveznog ministarstva privrede i srpske vlade - precizirao je Vencel na konferenciji za novinare u Berlinu.

Na dodatno pitanje da li savezna njemačka vlada plaća savjetnike srpskog predsjednika Vučića, Vencel je odgovorio: „Sklopili smo upravno partnerstvo koje u saradnji sa srpskom vladom pomaže pri izgradnji i razvoju proizvodnih lokacija njemačkih firmi srednje veličine u Srbiji. U tom sklopu finansiramo i savjetničke aktivnosti na terenu“.

Članak u kojem se prethodno navodilo da Heskensa koji već 13 godina savjetuje predsjednika Srbije Aleksandra Vučića plaća njemačka vlada i da se on u velikoj meri se fokusira na zaštitu njemačkih ekonomskih interesa u Srbiji, objavili su ove nedjelje kao zajedničko istraživanje Balkanska istraživačka mreža (BIRN) i njemački magazin Špigel.